Qaýipsizdik Keńesiniń otyrysynan keıin Úkimet birden tarıfterdi tómendetý jáne jalpy, tarıf jasaý júıesiniń ashyqtyǵyn qamtamasyz etý boıynsha sharalardy aıqyndady. Quramyna energetıka, ulttyq ekonomıka mınıstrlikteriniń, Bas prokýratýranyń ókilderi engen Jumys toby quryldy. Basty maqsaty — túpki tutynýshylar úshin tarıfterdi tómendetý. Atap aıtqanda, elektr energııasyn óndirýdiń ózindik qunyn anyqtaý ádistemesi jasalyp jatyr. Tabıǵı monopolısterdiń qarajatynyń maqsatty paıdalanylýyna memlekettik baqylaýdy kúsheıtý jáne monopolııaǵa qarsy qyzmetti kúsheıtý boıynsha zańnamaǵa túzetýlerdi ázirleý bastaldy.
Energetıka, ulttyq ekonomıka mınıstrlikteriniń aldyna 1 jeltoqsanǵa qaraı 2019 jyldyń 1 qańtarynan bastap tarıfterdi tómendetýge múmkindik beretin júıeli sharalardy ázirleý boıynsha mindetter qoıyldy. Otyrys barysynda birqatar mańyzdy máseleler atalyp ótildi. Birinshiden, tarıfterdi qalyptastyrý úrdisiniń ashyqtyǵyn qamtamasyz etý, ekinshiden, energetıka qyzmetteri naryǵyndaǵy baǵanyń qalyptasýyna memlekettik organdar tarapynan baqylaýdy kúsheıtý. Tarıfterdi tómendetý úshin barlyq qajetti sheshimderdi jyldam qabyldaý kerek.
Otyrysta energetıka, ulttyq ekonomıka mınıstrlikteriniń baıandamalary tyńdalyp, jumystary maquldandy.
Sonymen qatar Premer-Mınıstr 2019 jyldyń 1 qańtarynan bastap elektr energııasy men jylýǵa ǵana emes, sý, gazben jabdyqtaý, káriz, telefon baılanysy jáne ınternet qyzmetterine tarıfterdiń tómendeýi kerektigin atap ótti. Sonymen qatar PIK tarıfterin qaıta qaraý kerek. Bul jergilikti ákimderdiń quzyretinde. Bul oraıda, tarıfterdiń tómendeýi monopolısterdiń kórsetetin qyzmetteriniń sapasyn tómendetpeýi tıis, olardyń óndiristeri ýaqytyly jańǵyrtylyp otyrýy kerek. Qurylǵan Jumys toby osy baǵyttarda jumys isteýi tıis.
Zańnamalyq ózgerister turǵysynan tarıf jobasyn usynǵan kezde jurtshylyq, sarapshylar bildirgen pikirlerdi, onyń ishinde, elektrondy túrde kelip túsetin pikirlerdi eskerý tapsyryldy. Keri baılanys ornaýy tıis. Ákimdikterdiń quzyryndaǵy óńirlerdegi tutyný normalary tarıfterin bekitý de jarııalanýy kerek.
Máseleni qaraý qortyndysy boıynsha Premer-Mınıstr birqatar naqty tapsyrmalar berdi.
Birinshi. Tabıǵı monopolısterdiń tarıftik smetalar men ınvestısııalyq mindettemelerdi oryndamaý, qyzmet qunynan óndiristik emes shyǵyndaryn zańsyz qosý boıynsha anyqtalǵan barlyq faktilerge taldaý júrgizý qajet. Josyqsyz monopolıster men tarıfterdi kóterý arqyly paıdaǵa kenelgen kompanııalar zań aldynda jaýap berýi tıis. Ony tergeý barysy jarııalanýy kerek. Eki aptadan soń aǵymdaǵy jaǵdaı týraly másele kezekti Úkimet otyrysynda qaralatyn bolady. Premer-Mınıstr quqyq qorǵaý organdarymen jáne prokýratýramen jumystardy úılestirýdi tapsyrdy.
Ulttyq ekonomıka mınıstrligine eki aptadan soń bıýdjetten sýbsıdııa túrinde bólinetin qarajatty monopolısterdiń maqsatty jumsaýy týraly baıandaýy tapsyryldy. Halyqty TKSh qyzmetteriniń barlyq túrlerimen qamtamasyz etetin uıymdardyń mindettemelerin oryndaýyn baqylaý nátıjeleri týraly esepter tyńdalatyn bolady.
Ekinshi. Ulttyq ekonomıka mınıstrliginiń Monopolııaǵa qarsy komıtet pen onyń óńirlik bólimsheleriniń jumysyn retke keltirýge qatysty tásilderine qoldaý bildirildi. B. Saǵyntaev óz tarapynan tabıǵı monopolııalar salasyndaǵy saıasat pen monopolııaǵa qarsy komıtet jumysyna jetekshilik etetin ulttyq ekonomıka vıse-mınıstri Serik Jumanǵarınniń jazalanǵanyn habarlady.
Úshinshi. 1 jeltoqsanǵa qaraı ulttyq ekonomıka, energetıka mınıstrlikteri elektr, jylý, sý men gaz berý, káriz, telefon baılanysy, ınternet tarıfteri qalaı jáne qanshalyqty tómendeıtini kórsetilgen jan-jaqty jospardy engizýi tıis.
Prezıdent «jumysty retke keltirip, áleýmettik jaýapkershilikti sezinip, ashyq bolyp, adamdardyń senimine laıyq bolý» mindetin qoıdy. Osyǵan baılanysty energetıka, ulttyq ekonomıka mınıstrlikterine jeltoqsannyń alǵashqy onkúndiginde dóńgelek ústel ótkizip, bul is-sharalar josparyn óńirlik bólimshelerdiń, prokýratýra ókilderiniń, monopolısterdiń, depýtattardyń, úkimettik emes uıymdardyń, BAQ-tyń qatysýymen talqylaý tapsyryldy.
Baqytjan Saǵyntaev qoǵamnyń Úkimettiń tarıfterdiń baǵasynyń jasalýynyń ashyqtyǵyn qamtamasyz etý jáne 2019 j. shekti tarıfterdi qalyptastyrý máseleleri boıynsha tásilderin bilýi tıis ekenin atap ótti. Ulttyq ekonomıka, energetıka mınıstrlikteriniń basshylary, sonymen qatar óńirlik bólimshelerdiń basshylary jyl sońyna deıin halyq pen BAQ aldynda monopolısterdiń ınvestısııalyq mindettemelerin oryndaý tıimdiligi, tarıfterdiń tómendeýi jáne halyqqa monopolıster zańsyz ıemdengen qarajattaryn qaıtarý sharalary týraly kópshilik aldynda esep berýi tıis.
Tórtinshi. Ulttyq ekonomıka mınıstrligine múddeli memlekettik organdarmen birlesip TKSh monıtorıngi respýblıkalyq júıesin qurý tapsyryldy. Monıtorıng júıesi qoǵam ókilderiniń qatysýymen jergilikti jerlerde jumys istep, tarıftermen, qyzmet sapasymen, halyqtyń suranysymen baılanysty barlyq máselelerdi kóterýi tıis.
Sonymen qatar QR UEM-ine osy aptanyń sońyna deıin TKSh tarıfteri boıynsha jedel jeli ashý tapsyryldy. Qabyldanǵan sharalar týraly BAQ-qa habarlap turýy tıis.
Besinshi. Ulttyq ekonomıka, energetıka mınıstrlikterine jáne óńir ákimdikterine kómirdiń, gazdyń, dári-dármektiń jáne áleýmettik mańyzy bar taýarlardyń baǵasyn erekshe baqylaýǵa alý tapsyryldy. Birinshi kezekte, ákimder baǵanyń negizsiz ósýine jol bermeı, kompanııalardyń «baǵany ózara kelisip alýynyń», aradaǵy deldaldardyń zańsyzdyqtaryn anyqtaýy kerek.
Altynshy. Bilim jáne ǵylym, densaýlyq saqtaý mınıstrlikterine osy salalarda halyqty alańdatyp otyrǵan ózekti máselelerdi sheshý boıynsha keńes ótkizý tapsyryldy. Negizgi aksent — oqý qunyn, sondaı-aq medısınalyq qyzmetter men dári-dármektiń baǵasyn tómendetý. Oryndalý merzimi — eki apta.
Jetinshi. Aqparat jáne kommýnıkasııalar mınıstrligine barlyq baǵyttar boıynsha osy jumystardyń barlyǵyn aqparattyq súıemeldeýdi jolǵa qoıý tapsyryldy.
